Американската компанија Твитер започна нов бран отпуштања по ултиматум од нејзиниот нов сопственик Илон Маск, пренесува Њујорк тајмс.
Според пишувањата на медиумите, причина за заминувањето на стотици луѓе било тоа што новото раководство на платформата го известило персоналот за работење со строги барања.
Непосредно пред ова, сопственикот и шеф на компанијата, Илон Маск, ги стави сите вработени пред избор – испраќајќи им имеил во кои се бара или напорно да работат или сами да си дадат отказ.
Како резултат на тоа, од луѓето беше побарано да се подготват за прекувремена работа и интензивни активности за да го изградат „новиот Твитер“ или да си заминат од компанијата. Во вториот случај, треба да се плати отпремнина.
NYT не дава точни податоци за тоа колку луѓе напишале барања за отказ.
На 27 октомври Маск склучи договор за купување на Твитер вреден 44 милијарди долари. Во исто време, тој на 8 ноември објави дека бројот на корисници на социјалната мрежа е значително зголемен ширум светот.
