Поп иконата Селин Дион денес ги откажа сите нејзини преостанати концерти закажани за 2023 и 2024 година, велејќи дека не е доволно силна за турнеја затоа што се борела со ретко невролошко нарушување, објави АФП.
Минатата година, 55-годишната канадска пејачка откри дека боледува од ретка здравствена состојба која влијаела на нејзиното пеење.
– Многу ми е жал што уште еднаш ве разочарувам сите… и иако ми го крши срцето, најдобро е да откажам се додека навистина не бидам подготвена да се вратам на сцената – напиша Дион на Твитер. „Не се откажувам… и едвај чекам повторно да ве видам!“, додаде таа.
View this post on Instagram
Во изјавата објавена од нејзиниот менаџер на турнеја се вели: „На големо разочарување светската турнеја „Courage“ на Селин Дион ги откажа сите преостанати датуми кои се моментално во продажба за 2023 и 2024 година“.
Во декември 2022 година, Дион објави видео со солзи на Инстаграм во кое вели дека неодамна и бил дијагностициран синдром на вкочанетост на мускулите и дека нема да биде подготвена да ја започне својата европска турнеја во февруари како што е планирано.
Таа рече дека нарушувањето предизвикува грчеви во мускулите и ја спречува да ги користи гласните жици „и да пее како што јас сум навикната“.
Нејзината „Светска турнеја Courage“ започна во 2019 година, а Дион заврши 52 концерти пред пандемијата „Ковид-19“ да го одложи остатокот од турнејата.
Таа подоцна го откажа северноамериканскиот дел од турнејата поради здравствени проблеми.
