На чело со фронтменот Адам Ламберт, легендарната група „Queen“, синоќа го репризираше легендарниот сет од фестивалот „Лајв Еид“ од 1985 година, откако бендот имаше 22-минутен настап на големиот хуманитарен концерт во Сиднеј, Австралија.
Настапот на „Queen“ всушност беше дел од 10-часовниот музички спектакл, чија цел беше да се соберат 10 милиони австралиски долари, за заедниците погодени од неколкумесечните пожари во Австралија.
Во катастрофалните пожари загинаа 33 луѓе и изгореа илјадници домови, а огромни штети доживеа и животинскиот свет.
Оливија Њутн Џон, Расел Кроу, Алис Купер, беа само некои од светски познатите ѕвезди кои беа дел од овој настан од големо значење.
Оригиналните членови на „Queen“, Брајан Меј и Роџер Тејлор, го одржуваат бендот во живот настапувајќи со Адам Ламберт, кој се прослави во шоуто „Американски идол“.
– Беше вистинска чест да се изведе целиот сет од „Лајв еид“ – порача Ламберт, со што го реинкарнираше историскиот настап на овој фестивал на оваа група.
Споменатиот фестивал од 1985 година се одржа на стадионот „Вембли“ во Англија, кога големите рок ѕвезди се здружија за помош на гладните во Африка.
Во таа прилика „Queen“, тогаш на чело со неповторливиот Фреди Меркјури, одржаа настап кој се смета за најдобар на сите времиња.
