Американската пејачка Лизо и нејзината продукциска куќа се тужени од три поранешни танчерки – Аријана Дејвис, Кристал Вилијамс и Ноел Родригез за сексуално вознемирување и непријателска работна средина.
Тужбата, поднесена во Лос Анџелес во вторникот, е против пејачката со вистинско име Мелиса Вивијан Џеферсон и нејзината продукциска куќа Big Grrrl Big Touring, Inc (BGBT).
Тужбата го истакнува и наводното непристојно и злоставувачко однесување на Ширлејн Квигли, директорка на танцовиот тим на Лизо.
Трите танчерки тврдат дека биле изложени на сексуално, религиозно и расно вознемирување, дискриминација и различни напади.
Дејвис и Вилијамс биле отпуштени, додека Родригез дала отказ поради „ужасно однесување“, според „West Coast Employment Lawyers“, која ги застапува танчерите.
Дел од тужбата го опишува патувањето во квартот на црвените светла во Амстердам, во февруари 2023 година, во кое изведувачките наводно биле под притисок да одат на вечерни „излегувања“, па морале тоа да го прават бидејќи се плашеле дека ќе ја загубат работата.
Една посета на клубот наречен Бананабар, наводно, резултирала со тоа што Лизо ги охрабрувала членовите на тимот да ги допираат голите изведувачки.
„Танчерите беа згрозени од тоа колку малку внимание Лизо покажуваше за телесната автономија на нејзините вработени и оние околу неа, особено во присуство на многу луѓе што ги вработуваше“, се наведува во тужбата.
Американската пејачка, добитничка на Греми, е позната по нејзиното застапување на боди позитивност и инклузивност во нејзината музика, како и по нејзиното реално шоу Watch Out For The Big Grrrls.
Танчерките, исто така, ја обвинија Лизо дека го привлекла вниманието на зголемувањето на килограмите на една од танчерките, Аријана Дејвис, а подоцна ја укорувала и ја отпуштила.
Лизо, исто така, „фрлаше експлозивни материјали“ кон нејзините танчери и се однесуваше „агресивно“ кон Вилијамс, се вели во тужбата.
Откако била отпуштена, Дејвис наводно била заклучена во соба додека член на безбедносниот тим ѝ го пребарувал телефонот.
Понатаму во тужбата се тврди дека Лизо ги обвинувала танчерките дека не танцуваат доволно добро и дека пиеле алкохол пред настапот, иако танцовата постава никогаш немала таква практика.
Ваквите обвинувања довеле до тоа неколку танчери повторно да мораат да поминат низ аудиција за нивните места, под „брутални“ критериуми со можност да бидат отпуштени, се вели во тужбата.
Квигли, исто така, наводно често ги „наметнувала“ своите христијански верувања на членовите на танцовата група и ги терала да се чувствуваат „непријатно“.
Во тужбата не е јасно дали Лизо знаела за обвинувањата против Квигли.
