Коронавирусот ќе биде со нас уште најмалку пет години, се вели во извештајот на Меѓународниот научен совет (организација која обединува над 200 научни здруженија од целиот свет) кој идентификува 53 критични фактори за еволуцијата на пандемијата – вклучувајќи го производството и глобалната дистрибуција на вакцини , надзорот на новите варијанти, можностите на националните здравствени системи, дезинформациите и соработката меѓу земјите – и идентификува три можни сценарија.
„Најверојатно глобалната стапка на вакцинација во 2027 година ќе остане под 70 проценти: тоа значи дека вирусот ќе продолжи да циркулира, со сезонски врвови што ги ставаат здравствените системи под стрес“, објаснуваат имунолозите, „Во ова сценарио, соживотот со вирусот нема да биде лесен: циклично ќе мораме повторно да прибегнуваме кон маски и да се ревакцинираме“.
Најпесимистичкото сценарио покажува дека процентот на глобални вакцинирани нема да надминува 60 проценти: во овој случај вирусот би останал во голема мера неконтролиран, со сериозни рецидиви во различни делови на светот и потреба од рестриктивни мерки како што е домашната изолација.
„Најоптимистичкото сценарио е она со максимална покриеност со вакцинација (до 80) и пристапност до вакцини во сиромашните земји: на овој начин вирусот нема да исчезне, туку би бил многу помалку опасен“, објаснуваат виролозите „Ова сценарио, сепак, е малку веројатно: најголемиот проблем е дистрибуцијата на вакцините, која, на пример, не функционира во Африка, поради тешкотијата да се однесат вакцините надвор од градовите“.
Инаку, денес Фајзер и Модерна вршат клинички студии за вакцината ажурирана за Омикрон, но не е познато дали ќе се појават други варијанти на есен. Ситуацијата се смета дека ќе остане променлива, со врвови на инфекции и некои смртни случаи, како што е случај и со сезонскиот грип.
