Кои земји би можеле да преживеат нуклеарна војна меѓу САД и Русија? Научниците во најновото истражување одговараат дека најголеми шанси можеби би имале популациите на Аргентина и Австралија, пишува Sunday Times.
Оваа детална анализа на ефектите од т.н нуклеарната зима покажа дека многу повеќе луѓе би можеле да умрат од индиректните ефекти на нуклеарната војна отколку од директните последици од нуклеарните експлозии.
Така, на пример, според нова студија, како што објави Блумберг, во годините веднаш по нуклеарниот конфликт, 5 милијарди луѓе би можеле да умрат од глад предизвикан од прашина во атмосферата, која би ја блокирала сончевата светлина, што веројатно би ги надминало жртвите предизвикани од самите смртоносни експлозии.
Анализата на Универзитетот Рутгерс во Њу Џерси се фокусираше на ефектите од намалената сончева светлина и температурата врз земјоделството, што би следеле по нуклеарните напади.
„Сите сфаќаат дека директните ефекти од нуклеарната војна би биле страшни, како што видовме во Хирошима и Нагасаки. Нашиот труд покажува дека десет пати повеќе луѓе би можеле да умрат во остатокот од светот поради влијанието врз климата и земјоделството“, рече еден од авторите на студијата Алан Робок за изданието на Nature Food, во кое беше објавено делото.
Дури и помал нуклеарен конфликт би убил повеќе од милијарда луѓе
Дури и релативно помал конфликт меѓу нуклеарните сили Индија и Пакистан би можел да донесе до глад повеќе од милијарда луѓе поради уништување на земјоделските посеви, повеќето од нив во земји далеку од самиот конфликт. Самите експлозии на нуклеарно оружје може да резултираат со смрт на 50 до 100 милиони луѓе.
Локален судир меѓу Индија и Пакистан би предизвикал пад на приносите за околу 7 отсто во рок од пет години, сугерира студијата, додека војната меѓу САД и Русија би предизвикала пад на производството за 90 отсто во рок од три до четири години, објави Блумберг.
