Младиот пејач Јаков Јозиновиќ, кој со само 20 години го освои регионот, покрај успешната музичка кариера сериозно му е посветен и на образованието.
Јозиновиќ, кој полни сали низ Балканот, во моментов е студент на втора година новинарство на Факултетот за политички науки во Загреб.
Кога не е на сцена, тој води живот како и секој млад човек – оди на предавања, учи и работи на своето усовршување.
Во гостување во емисијата „Код нас дома“ на ХРТ, младиот пејач откри дека пред музичката кариера работел различни физички работи.
„Пред само три години работев на археолошки ископувања, на 40 степени. Бидејќи доаѓам од Винковци, тоа е археолошки богато подрачје, па навистина можеше многу да се пронајде. Потоа работев и во производство на свеќи, па во овоштарници – берев овошје за дневница. Навистина сум работел секаде“, раскажа тој.
Јозиновиќ се проби на музичката сцена минатата година, и тоа без ниту една објавена авторска песна.
Благодарение на платформата ТикТок, тој стана хит низ регионот, изведувајќи песни од легендарни имиња како Оливер Драгојевиќ, Владо Георгиев и Ѓорѓе Балашевиќ.
Со својот глас и емоција, брзо ја освои публиката и денес важи за едно од најбараните млади имиња на сцената.
