Вчеравечер во арената „Борис Трајковски“ се случуваше 26. Златна бубамара на популарноста, под слоганот „Да наполниме батерии во скапа тарифа“.
Како и секоја година во ова време, манифестацијата направи пресек на овогодишната креативна продукција, сатирично ja раскаже измината година и ги награди најголемите уметници од Македонија и регионот.
На местото на водителот Сашко Коцев (кој е водител на оваа манифестација од 2006 година), овојпат беа глумците Тино и Атанас кои се погрижија за добра забава на публиката.
– Бев премногу зафатен, не можев да постигнам. Имав две претстави и турнеја во Словенија со филмот, изјави Сашко за „Слободен печат“ веднаш по манифестацијата, додавајќи дека годинава му се поклопиле ангажманите.
Но, затоа Игор Џамбазов, кој е дел од Златна бубамара уште од почетоците, се качи на сцената и, меѓу другото, прозборува и за починатите колеги Мара Попара, Марин Бабиќ и Милан Завков.
Хармоникашот Завков починал две недели пред да ја прими наградата за животно дело, па ја доби постхумно.
На сцената се појавија и Ефто Пупиновски, Блага Петреска, Ламбе, поранешната мисицата Марија Васиќ, бендот Меморија, водителката Ирена Спировска, Некс Тајм, ДНК и многу други познати лица, а внимание заслужија и Влатко Стефановски и Џибони.
