Фановите на Ана Ѓуриќ Констракта распишаа петиција на српската претставничка на Евровизија да ѝ се додели национална пензија.
Во образложението навеле дека уметницата на најдобар можен начин ја претставила Србија во светот и заслужува да биде наградена.
„Ана со својата уметност, став, интелигенција, секој гест и изговорена реченица на светот му ја покажа најубавата страна на нашиот народ. Таа гордо го истакна знамето на секое место и чекор, пред милиони гледачи на најголемиот телевизиски спектакл во светот. Таа гордо ја пееше својата песна на мајчин јазик. Да не беше влијанието на политиката, голема е веројатноста дека ќе победеше“, стои во изјавата на покренатите петиција, која досега ја потпишале 189 лица од Србија.
Констракта ентузијастички ја сподели оваа акција на Инстаграм и во свој стил напиша: „Констракта нека се пензионира“. Таа потоа им се обрати на следбениците на социјалните мрежи и призна дека не е сигурна дека ги исполнува потребните услови:
„Ова е убаво со пензионирањето, но морам да ви кажам дека сум слаба со стажот. Не знам дали ќе го закрпам и да се вработам утре. Така да, ќе биде тоа познатата приказна за Штурецот и мравката“.
Откако се врати дома, во Србија, како што вели сама – „таа и кофата“, со уште неколку изјави ја освои публиката. Меѓу изјавите имаше и такви каде вели дека преферира да се вози со автобус, дека не е ѕвезда и дека не го сака животот на ѕвезда.
