Нашиот композитор и пијанист, легендарниот Никола Мицевски постигна огромен меѓународен успех. Стана првиот Македонец кој стигнал во финалето на глобалните музички награди Интерконтинентал мјузик авордс (InterContinental Music Awards- ICMA) во Лос Анџелес.
Тој се пласираше во финалето со неговата фантастична инструментална композиција „TIME“ од албумот ,,Нова ера” (New era).
,,Навистина сум среќен што мојата композиција влезе во конкуренција на многу композиции и музика од целиот свет.
TIME е универзална музика со нота на македонска карактеристика и дух и сум посебно горд и среќен заради тоа.
Овој натпревар е вистинска можност музиката на секој артист да се слушне насекаде во светот.Им посакувам на сите финалисти среќа и успех во финалето”, напиша Мицевски.
Неговото дело е препознаено во категоријата „World Music“, благодарение на уникатниот спој на традиционалниот македонски народен мелос со современи симфониски аранжмани.
Квалитетот на делото беше препознаен и високо оценет од стручно жири составено од холивудски продуценти.
Во ова комплексно дело со свои виртуозни гитарски делници гостува познатиот македонски гитарист Дамјан Пејчиносkи. Прекрасниот видеоспот за оваа тема е во режија на Даниел Јовески.
Преку неговиот пласман, Македонија за првпат се најде на официјалната мапа на финалисти, рамноправно стоејќи покрај музички уметници од над 100 земји ширум светот. Тој е првиот што успеа да го претстави автентичниот македонски народен ритам и инструментален карактер директно пред комисија од врвни холивудски продуценти.
Официјалното прогласување на победниците од финалниот круг ќе се одржи на онлајн церемонија на 23 август 2026 година.
Браво Никола!
