Македонскиот моден дизајнер Златко Јовановски – ЈЗЈ откри дека во изминатите години одбил да соработува со македонски јавни личности кои барале бесплатно да им изработи креации, нагласувајќи дека денес самиот одлучува кому ќе подари фустан.
Гостувајќи во емисијата „Полиграф“, Јовановски зборуваше за соработките со регионалните ѕвезди, но и за принципите според кои ги избира своите клиенти.
„Да, им ги подарувам, а не чинат толку. Во последните 3 години, јас бирам со кого работам. Јас немам проблем да работам со кој било, ако тој некој плати. Кога подарувам – бирам јас.
За Карлеуша можам да кажам дека е мој клиент веќе неколку години. Таа секогаш прашува колку чини, ама јас знам колкава популарност и колкав вирален пост ќе добијам од неа.
Мерак ми е да ги носи моите креации, па ѝ кажувам дека не треба ништо и дека ѝ се подарок од мене, иако таа никогаш не го побарала тоа и со мене е фина и фер соработник“, изјави Јовановски.
Потоа се осврна и на искуствата со дел од македонските јавни личности, откривајќи дека не прифаќа да работи бесплатно.
„Од друга страна, факт е дека многу македонски јавни личности знаат да побараат нешто гратис или да побараат нова креација да се направи за нив за без пари.
Јас со тоа не се сложувам, ниту да се изнајми, ниту да се прави, зашто јас првично, каков фидбек ќе имам од тебе? Мене тоа ме интересира.
А второ што ме интересира е таа креација ако е со долга опашка или ако е долга хаљина што се влече, ти кога ќе го уништиш тој фустан на тие 15-20 минути или 3 саати настан, како јас после, утре да го продадам? Кој ќе сака да го купи?
Зошто јас да ја изгубам мојата креација, така што, тоа мора да се плати, што е нормално“, порача дизајнерот.
