Еден од најомилените регионални уметници на Балканот, Здравко Чолиќ, пред околу две и пол години настапи во Бар, а публиката очигледно повторно посака да ужива во неговиот моќен вокал, безвременските песни и енергичниот, емотивен концерт.
Чолиќ пееше пред околу 30.000 луѓе, цели три часа без пауза, а во публиката беа и неговите ќерки Уна и Лара. И покрај студениот ветер и ниската температура, присутните бараа бис.
„Кралски, легенда, ваква атмосфера може да направи само Чола. Музичка икона на Балканот“, беа само дел од коментарите на публиката по концертот.
„Среќен сум што повторно ме побараа. Имаше иницијатива да пеам во Бар за Нова година. Новата година е посебен ден, повеќе како фешта. Ми е драго што пак се дружиме во Бар и навистина се радувам на концертот“, изјави Чолиќ.
Говорејќи за желбите во Новата година, Чолиќ истакна дека на прво место го става здравјето.
„Да бидеме здрави, да можеме да работиме, да се бакнуваме, да се гушкаме и да се сакаме. Колку ќе се заработи — ќе се заработи. Важно е здравјето, мирот меѓу нас и да нема проблеми какви што, за жал, постојано гледаме во светот. Тоа е првото што човек може да си го посака“, рече пејачот.
Чолиќ откри и дека би сакал да одржи концерт со симфониски оркестар во Црна Гора.
„Во октомври настапивме во Подгорица, со два концерта во спортската сала. Можно е летово да направиме нешто. Ќе видиме. Би било убаво да се случи нешто со симфониски оркестар — тоа го сакам, еден посериозен, поинаков концерт. Но, полека, ќе видиме“, заклучи Чолиќ.
