Синоќа ненадејно на 47 години почина Андон Бошковски, еден од најпознатите ракометни тренери во земјава. Оваа тажна вест ја соопшти Ракометната федерација на Македонија.
„Со длабока тага и неверување Ве информираме дека ненадејно почина Андон Бошковски – Доне. Сочувство до семејството, нека почива во мир“, објави РФМ.
Бошковски додека играше го носеше дресот на Работнички, а беше и дел од кадетската репрезентација. Кариерата мораше да ја заврши премлад поради повреда на раката.
Во Работнички тој ја почна и тренерската кариера. Подоцна беше асистент тренер во Металург со кого стана македонски шампион и играше во ЛШ.
Од Металург седна на клупата на Младост Богданци, за во 2011 година повторно да се врати во Автокоманда.
Како главен или помошен тренер работеше и во Младост, Вардар, Струга, Тинекс Пролет, Еурофарм Работник, но и во Романија и во Косово, каде што го имаше последниот ангажман.
Беше селектор на Грузија и дел од стручниот штаб на македонската репрезентација на неколку големи натпреварувања.
