Не верувам дека е можно една земја да реагира на таков начин. Верувам дека ќе имаме можност да разговараме за ова со нашите молдавски пријатели и да решаваме такви работи во иднина, изјави српскиот претседател Александар Вучиќ во Атина на прашањето за забрана за влез на музичарот Горан Бреговиќ и членовите на неговиот бенд во Молдавија, каде што требаше да имаат концерт.
На Бреговиќ му беше забранет влезот поради, како што соопштија молдавските власти, неговите проруски ставови и поддршката за руската анексија на Крим.
Вучиќ рече дека немал можност на оваа тема да разговара со претседателката на Молдавија, Маја Санду, која е на самитот во Атина со него и со други лидери на земјите од Западен Балкан и Украина.
„Кога видов дека на некого во молдавската јавност му пречи Бреговиќ како ја пее песната „Калашников“, тогаш застануваш и се прашуваш што е ова луѓе? Како да слушам некои луѓе во Белград. Тогаш разбираш дека се такви глупости што доаѓаат од социјалната мрежа“, рече Вучиќ.
