Љубиша Павковиќ, виртуозот на хармоника и долгогодишен шеф на Народниот оркестар на „РТС“, сподели неверојатни детали од својата кариера кои фрлаат сосема ново светло на најголемите легенди на народната музика – Тома Здравковиќ и Силвана Арменулиќ.
Иако со децении се романтизира односот помеѓу Тома и Силвана, Павковиќ тврди дека меѓу нив немало ништо повеќе од професионална соработка.
„Љубов помеѓу Силвана и Тома воопшто не постоеше. Да ја имаше, целиот Белград ќе знаеше за тоа. Тома беше вљубен во алкохолот и коцката“, дециден е музичарот.
Тој се потсетува дека токму тој, како 23-годишно момче, го направил аранжманот за нејзиниот најголем хит „Шта ќе ми живот“.
Морничави детали од кобната несреќа
Сеќавањата на 10 октомври 1976 година, кога Силвана го изгуби животот, сè уште не бледеат. Павковиќ открива зошто пејачката му го предала воланот на Раде Јашаревиќ.
„Веројатно не би му дала да вози, но имаше бурна ноќ претходно во Пожаревац, дури и со главата удрила некаде. Сметаше дека тој ќе биде посигурен и му го даде автомобилот“, објаснува тој.
Призорот на местото на несреќата кај Коларе бил апокалиптичен.
„Небото и земјата гореа! Автомобилот буквално не постоеше. Бараа предмети на сто метри низ нивата, а ја најдоа само нејзината сандала. Силвана имаше само 37 години, а со неа загина и Мирјана која беше бремена… Страшно е тоа што се случи“, сведочи музичарот.
Од тешка сиромаштија до бакшиш од 8.000 долари
Пред да стане легенда, Павковиќ живеел во голема немаштија во Белград. Како дете носел преголеми џемпери од постарите браќа, а кога почнал да свири во рестораните, од срам одбивал да земе бакшиш.
Сепак, неговиот талент подоцна му донел неверојатни заработки. Тој се присетува на една ситуација од Москва пред 20 години:
„Свирев за еден амбасадор околу три часа. Кога завршивме, ми дадоа торба со зборовите: ’Ова е за нашето Миланче, да му тргне‘. Внатре имаше 8.000 долари! Тоа беа навистина куп пари“, заклучува Павковиќ.
