Секогаш е вистински мерак да се слушне нешто ново од „Ареа“, исто како што е мерак да се позборува со Ружица, „ураган“ на позитивна енергија.
Е сега замислете каков пак мерак е тоа да се помножи по единаесет пати, по онолку песни колку што содржи новиот издаден албум „Ареа“, насловен „Љубов е“.
Љубов е, нема што. Кон музиката, кон традицијата, кон доследноста, кон трпението и истрајноста, кон креативноста, уметноста…љубов кон љубовта.
Албумот е работен долго време, а со него „Ареа“ одбележаа и 30 години на музичката сцена.
Ја прашавме Ружица што значи за неа да се биде 30 години на музичката сцена и како се останува долго време на пиедесталот.
– 30 години изгледаат многу, но 30 години на сцена мене ми изгледаат малку, зошто сѐ што е убаво имам впечаток како да лета(се смее, н.з). Или, со други зборови, прекрасно е да го работиш тоа што го сакаш, па и по цели 30 години ја чувствувам истата страст и енергија кога пеам. Инаку пиедесталот не го одржувавме постојано, имавме и периоди на повлекување, но никогаш не се откажавме од музиката. Можеби на сцената сме цели 30 години и поради тоа што желбата за креација надвладеа над желбата за пари и популарност по секоја цена, така што останавме доследни на стилот што го негуваме, останавме свои – ни одговори таа.
Честитки!
