Марко Гвозденовиќ (46), син на познатата српска фолк пејачка Снежана Ѓуришиќ, бил итно примен во болница откако бил брутално претепан во еден стан на Врачар во Белград, дознава српски „Телеграф“.
Според неофицијални информации од истрагата, инцидентот се случил во неделата, 15 февруари, во попладневните часови кога Гвозденовиќ отишол да го посети својот сосед.
Под околностите коишто сè уште прецизно се утврдуваат, меѓу двајцата мажи избувнала жестока расправија, која набрзо ескалирала во физичка пресметка.
Извор близок до истрагата наведува дека соседот физички го нападнал Гвозденовиќ и му задал повеќе удари. Со лекарскиот преглед се констатирани сериозни повреди – скршени ребра.
Гвозденовиќ е свесен, комуникативен и во моментот е во стабилна состојба, но е задржан за понатамошна дијагностика.
По повод со овој инцидент, надлежните органи веднаш реагирале. Како што дознава „Телеграф“, истрагата за целиот случај ја презело Првото основно јавно обвинителство во Белград.
Обвинителството наложило собирање на сите потребни докази, земање изјави од учесниците и сведоците, како и доставување на медицинска документација за степенот на повредите што ги претрпел Гвозденовиќ. Се очекува против напаѓачот да биде поднесена соодветна кривична пријава во редовната постапка или да се определи притвор, во зависност од понатамошните наоди од истрагата.
