По долгогодишната правна битка меѓу Северина и нејзиниот поранешен партнер Милан Поповиќ, пристигна нов пресврт во спорот за старателството над нивниот син Александар.
Општинскиот граѓански суд во Загреб донесе неправосилна пресуда во долгогодишниот спор за старателството над синот на Северина Вучковиќ и српскиот бизнисмен Милан Поповиќ.
Нивниот син Александар отсега ќе живее со мајката, потврди адвокатката на Северина, Јасминка Билош, за порталот „Индекс“.
Поради чувствителноста на случајот, таа не сакала да открива повеќе информации во јавноста, но познато е дека нивниот 14-годишен син во наредниот период ќе живее со мајката, додека односите и средбите со таткото ќе бидат уредени со судска одлука.
Спорот меѓу Северина Вучковиќ и Милан Поповиќ околу старателството над синот Александар започна уште во 2013 година, кратко по нивното раскинување.
Во текот на повеќе од една деценија следуваа бројни судски одлуки, жалби и нови рочишта пред судовите во Хрватска. Еден од најголемите пресврти се случи на почетокот на 2024 година, кога Врховниот суд на Хрватска ја укина претходната одлука за заедничко старателство и привремено грижата за детето му ја додели на таткото.
Подоцна, Жупанискиот суд во Сплит донесе нова одлука со која повторно беше уредено заедничкото родителско старателство.
Целиот спор трае повеќе од 12 години и стана еден од најследените семејни судски процеси во регионалната јавност.
