Српските медиуми тврдат дека откриле од каде потекнува големата дива мачка која шета низ Србија, односно покрај границата со Хрватска.
Новинарите сметаат дека се работи за истото животно кое ги наполнило страниците на унгарските медиуми во декември минатата година и јануари годинава. Недолго потоа, пантерот бил виден околу српскиот град Апатин, а луѓето биле предупредени да се држат настрана од животното. Иако тој не ги гледа луѓето како храна, би можел да нападне доколку се почувствува загрозен, па затоа се препорачува сите да останат подалеку од него.
Унгарскиот портал Ориго минатата година напиша дека пантерот за прв пат е виден во околината на градот Олаш. Луѓето биле вознемирени, а големата мачка потоа отишла малку подалеку, во соседната област. Уште тогаш, експертите врз основа на снимките што ги направиле луѓето утврдиле дека не може да се работи за домашен пантер. Луѓето кои го виделе велат дека е поголем од куче тешко 60 килограми.
Експертите веруваат дека најверојатно се работи за животно кое имало сопственици. Имено, мала е можноста тој да дошол во Унгарија од негово природно живеалиште. Со оглед на тоа дека е ловец, очигледно отишол во соседната земја во потрага по плен.
– Ако е пантер, нема шанси некој да го сретне во центарот на градот. Тој се движи низ шумските предели и таму може да се сретне. Ова животно веројатно е одгледано, хрането и згрижено од луѓе. Не е навикнат на лов како начин на живот, па затоа никогаш нема да ги гледа луѓето како храна. Сепак, може да нападне ако се почувствува загрозен и во тој случај може да биде опасен – изјавил Золтан Ханга, портпарол на Золошка градина, за порталот Ориго.
