Денес нè напушти легендарната вокалистка на групата „Мањифико“, Невена Кочовска. Почина во Скопје на 81 годишна возраст. Долги години боледуваше од Алцхајмер.
Невена, сопруга на Панче (и мајка на Тања и Лидија Кочовски), беше дел од вокално – инструменталниот ансамбл „Мањифико“ во кој настапуваше заедно со сопругот. Групата беше активна и многу популарна на сцената, и надвор од Македонија и Југославија, повеќе од 30 години. Во текот на нивното 31-годишното постоење, „Мањифико“ настапиле во 37 земји, остварувајќи 3700 концерти, а покрај тоа учествувале и на 600 добротворни настапи.
Веста на својот Фејсбук профил ја споделија нејзината ќерка Тања објавувајќи две фотографии од мајка си, едната понова а другата од помладите денови.
Иако болеста ѝ напредувала, нејзиниот глас, како што во една прилика изјави нејзината ќерка Тања, останал моќен. Помладата ќерка на Невенка, Лидија Кочовска неретко од удобноста на нивниот дом знаеше да нѐ почести со прекрасен музички поздрав упатен преку социјалните мрежи во придружба на нејзините родители.
Со неповторливата Невена, која беше инспирација за цели генерации пејачи, се простуваат на социјалните мрежи голем број на личности од музичкиот и актерскиот свет и општествениот живот.
