Познато е дека Наум Петрески беше многу близок пријател со Андреј Ѓорѓиески од дуто „ДНК“ кој трагично загина во пожарот во дискотеката „Пулс“ во Кочани на 16 март. На фолк-пејачот многу тешко му паѓа загубата на другарот, со кој често објавуваа заеднички слики од седенки, родендени, прослави, промоции.
Наум и Андреј не беа само колеги, туку и семејни пријатели, па одеа и на заеднички викенди со семејствата.
За да му се оддолжи за годините дружба, Наум Петрески на Андреј му посвети песна. И тоа не било која туку „Ако умрам ил загинам“ од легендарниот Јонче Христовски. Оваа преработка е дел од проектот „Македонијо, во срце те носиме“.
Песната, во својот нов аранжман е потпишана од Николче Мицевски, и го задржува духот на оригиналната верзија на Јонче Христовски, кој е и комплетен автор на композицијата. Наум Петрески, со својот препознатлив глас, ѝ дава нов живот, како молитва за земјата, но и како проштална порака до сакан пријател. Во видеоспотот кој многумина ќе расплаче се редат слики од дружењата на Наум и Андреј.
„ Андрејчо беше најхрабрата личност што ја познавав. Тој не беше висок, но имаше лавовско срце, не се повлекуваше пред никого и немаше страв од никого. Толку бевме блиски што ве викаше тате. Како син си го сакав. Какви планови имавме, толку работи требаше да направиме“, рече Наум Петрески неодамна за „Бекстејџ“.
Андреј беше посветен татко на десетгодишната ќерка Јана и вљубен во својата сопруга Наталија.
„Ако умрам ил’ загинам, ќе останат спомени. Приказна за едно другарство поголемо од животот“, пишува на Фејсбук страницата на „Македонијо, во срце те носиме“.
