Фолк-ѕвездата Зорица Брунцлик по двомесечна пауза повторно се врати во жирито на емисијата Пинкови ѕвезди, а пред медиумите отворено проговори за причините за нејзиното отсуство.
Пејачката откри дека паузата ја направила поради сериозна здравствена интервенција – операција на дебелото црево, додавајќи дека закрепнувањето поминало успешно.
„Имав тешка операција, но сè заврши добро. Апелирам до сите редовно да одат на систематски прегледи, особено по 50-тата година“, изјави Брунцлик.
Таа нагласи дека во текот на целиот период најголема поддршка ѝ бил нејзиниот сопруг, Мирољуб Аранѓеловиќ Кемиш.
„Кемиш беше со мене, буквално во секој момент. Ми беше најголема поддршка“, рече пејачката, додавајќи дека многу колеги се јавувале за да ја охрабрат.
Брунцлик не криела дека станува збор за сериозна здравствена состојба, истакнувајќи дека токму занемарувањето на превентивните прегледи довело до компликации.
На снимањето во студиото во Шимановци, таа пристигна во лежерно издание, а подоцна се пресоблече во впечатлив стајлинг со шарени детали и жолти чевли, со што повторно го привлече вниманието.
Нејзиното враќање беше проследено со топол пречек – колегите од жирито и водителите ја поздравија со прегратки, додека публиката ја награди со громогласен аплауз.
Пејачката не ја симнуваше насмевката од лицето, покажувајќи дека и покрај тешкиот период, повторно е подготвена за нови предизвици на сцената.
