Младиот пејач Јаков Јозиновиќ продолжува да руши рекорди на регионалната музичка сцена. Откако за само 20 минути ги распродаде билетите за деветтиот концерт во Сава центар, тој најави и десетти настап пред белградската публика.
Веста ја сподели преку социјалните мрежи, каде емотивно им се заблагодари на своите обожаватели за огромната поддршка.
„Најавувам нов, рекорден, десетти Сава центар! Ви благодарам за сета љубов“, порача пејачот, откривајќи дека продажбата на билети започнува на 4 април.
Интересот за неговите концерти е исклучително голем. За деветтиот настап, дури околу 9.000 луѓе чекале во виртуелен ред за да обезбедат билет, што уште еднаш го потврдува неговиот растечки успех.
Сава центар, особено познатата Плава сала со капацитет од околу 4.000 посетители, важи за една од најзначајните концертни локации во регионот. Со првите девет концерти, Јозиновиќ се очекува да собере околу 36.000 посетители.
Со овој успех, тој веќе се израмни со легендарниот Здравко Чолиќ, кој во 1998 година одржа девет распродадени концерти по ред. Апсолутниот рекорд, сепак, и понатаму го држи Лепа Брена со 17 последователни настапи во осумдесеттите години.
Јозиновиќ не запира тука – веќе се најавени и големи концерти во Арена Загреб, со што дополнително го зацврстува статусот на еден од најбараните изведувачи во моментов.
По настапите, пејачот често останува во контакт со медиумите, но и со колегите од сцената. На еден од концертите му се придружи и Џејла Рамовиќ, а по завршувањето следуваше опуштена атмосфера со музика и дружење.
