Израел и палестинската милитантна група Исламски џихад доцна синоќа прогласија прекин на огнот, што ги зголеми надежите за крај на најсериозниот конфликт во Појасот Газа за повеќе од една година. Израелските сили пукаа кон палестински цели во текот на викендот, што предизвика палестинска одмазда и ракетни напади врз израелските градови. Пукањата главно престанаа од моментот на стапување на сила на примирјето во 23:30 часот по локално време, пренесува Хина.
Прекинот на огнот беше објавен во одделни соопштенија на Исламски џихад и Израел, во кои му се заблагодарија на Египет што посредуваше во примирјето.
Хамас не се вклучи, 44 загинати Палестинци
Тридневните судири потсетија на минатите војни во Газа, иако тие беа релативно контролирани бидејќи Хамас, владејачката исламистичка група во Појасот Газа и помоќна сила од Исламскиот џихад кој го поддржува Иран, не беше вклучена.
Официјални лица во Газа соопштија дека досега се убиени 44 Палестинци, од кои речиси половина биле цивили, вклучително и деца. Ракетите му се заканија на поголемиот дел од јужен Израел и ги принудија жителите на градовите, вклучувајќи ги Тел Авив и Ашкелон, да се кријат во засолништа.
