Познатиот музичар Сефедин Бајрамов се потсети на почетоците на кариерата на Каролина Гочева и на нејзиниот дебитантски настап на фестивалот „Си-До“.
Повод за неговата емотивна објава беше неодамнешната средба на Каролина и Маја Оџаклиевска, кои на 1 септември беа дел од големиот концерт на плоштадот „Македонија“ во Скопје.
Бајрамов откри дека бил член на жирито кога Каролина дебитирала на детскиот фестивал „Си-До“ и дека уште тогаш во младата пејачка препознал голем талент и ја споредил со Оџаклиевска.
„Не можам, а да не ја споделам мојата радост, задоволство и ‘пророштво’. На фестивалот ‘Си-До’, кога дебитираше Каролина, бев член на жирито. Откако отпеа Каролина, нормално, ѝ дадов максимум бодови, а мојот коментар беше: ‘Родена е наследничката на Маја Оџаклиевска’. И бев во право!!! Ви посакувам уште многу успеси во животот и кариерата“, напиша Бајрамов.
Маја Оџаклиевска и Каролина повторно се најдоа на иста сцена на 1 септември, на концертот на славниот шпански тенор Јосе Карерас и македонските ѕвезди на плоштадот „Македонија“ по повод 35 години независност на Македонија. На концертот настапија Хозе Карерас и Македонската филхармонија, како и повеќе познати македонски музички имиња, меѓу кои Влатко Стефановски, Калиопи, Наум Петрески, Сузана Спасовска, Ана и Игор Дурловски и Миле Кузмановски.
Оџаклиевска таа вечер меѓудругите ја отпеа „Македонско девојче“, додека Каролина настапи со „Ако згрешам нека изгорам“. Концертот се одржа пред преполниот плоштад, а оркестарот на Филхармонија го предводеше диригентот Сашо Татарчевски, со оркестрации на Николче Мицевски.
Средбата на двете пејачки добива дополнителна симболика токму поради споменот што го сподели Бајрамов, дека уште на самиот почеток на кариерата на Каролина ја видел како наследничка на легендарната Маја Оџаклиевска.
