Претседателката на Европската комисија Урсула фон дер Лајен предупреди дека со намалувањето на испораките на гас од Русија, Европа треба да се подготви за нивно целосно прекинување, што, според нејзиното мислење, ќе се случи „порано или подоцна“. Ваквиот став таа го искажа во интервју објавено во понеделникот за агенцијата ДПА.
„Во моментов, Русија само делумно испорачува гас или воопшто не доставува за 12 земји-членки [ЕУ]“, рече фон дер Лајен. „Затоа, Европа мора да биде подготвена за најлошото сценарио: целосно запирање на испораките на гас порано или подоцна“, рече таа.
Во исто време, таа ги повика земјите кои се помалку зависни од испораките на руски гас, исто така, да учествуваат во напорите за заштеда на енергија. „Дури и земјите-членки на [ЕУ], кои речиси и да не добиваат гас од Русија, не можат да ги избегнат последиците од можното прекинување на испораките на нашиот домашен пазар“, рече фон дер Лајен. Економиите во Европската унија, рече таа, се тесно испреплетени, гасната криза ќе ги погоди сите земји членки во една или друга форма.
„Затоа, важно е сите земји-членки да ја намалат својата потрошувачка, за сите да штедат повеќе и да го делат [гасот] со оние членки кои најмногу настрадале“, заклучи претседателката на Европската комисија, додавајќи дека „енергетската солидарност е основниот принцип на европските договори“, пренесува тасс.
