Маја Синадиновска, некогашната водитека на ноќната програма „1001 ноќ“ во која ги рушеше табауата и со своите гости зборуваше за еротиката, сега е успешна претприемачка, таа има свој бутик за облека за големи броеви.
„Многу нешта, речиси сè што беше табу пред 30 години остана табу до денешен ден. Ние сме општество кое навидум чекори напред, а всушност секој ден или се враќаме чекор наназад или стагнираме. Ние сме народ кој навидум сака прогрес, а седи со скрстени раце.
Промените не можат да се издејствуваат молкум, седејќи на домашниот тросед. Треба ангажман, потребни се идеалисти, гласноговорници, двигатели и конечно и народ, кој ќе сака да следи. Како нација сме научени да чекаме друг да ни го сервира сработениот напредок на секој можен план, плашливи сме.
Од друга стана ова е волчјо време, време на револуционерна технологија, на војна на моралот и етиката против развратот и криминогените елементи. Во едно вакво време и општество, како би можела жената да се промени, да отвора нови, за себеси позитивни, хоризонти?
Впрочем, и во минатото и денес, не само жената, туку и сите ние како општество ги живееме секојдневно сите табуа, но кога треба да зборуваме за нив, да ги побиеме, да ги разнебитиме, ние остануваме неми. Двојниот морал царува со децении кај нас.
Секогаш и за сè што е табу му префрламе на соседот, пријателот, роднината, додека ние во преден план го практикуваме, другиот го озборуваме и го линчуваме јавно. Жената е сè уште најголемиот непријател на друга жена кога треба да се „спаси“ себеси. Прогресот е во обединување на прогресивната мисла и во нејзиното објавување.
Тој елемент е длабоко отсутен кај нас. Сè додека го потенцираме „неморалот“ на друга жена пред мажи, ние назадуваме. Што е уште потрагично, и мажите во нашето општество почнаа да наликуваат на жените. Во минатото барем тие ни беа репер, сега немаме репер. Царува личниот интерес, колективното отсуствува буквално на секој план. Кога нема идеологија, нема прогрес“, рече Маја во една прилика за „Слободен печат“.
Таа и денес често објавува провокативни слики и статуси на социјалните мрежи, а во најновиот објавила една своја постара слика, но со интересна мисла: „Правило број 1, никогаш не дозволувавајте да бидете жена број 2“.
