Жртвите од земјотресот во Турција и Сирија надминаа 19.300, надминувајќи ја јапонската катастрофа во Фукушима, пренесува Асошиејтед прес.
Според Вашингтон пост пак, бројот на жртви е над 20.000.
Во меѓувреме во целата несреќа пристигнува и по некоја светла вест. Денес две деца на возраст од 2 и 3 години беа спасени 70 часа по земјотресот, како што извести турската агенција Анадолу. Малиот Мерт Татар (2) утрово е спасен од земјотресот во јужната провинција Хатај: малото момче веднаш било пренесено во болница. Додека 3-годишното девојче Еја Хадап било извлечено од урнатините денеска, 70 часа по земјотресот, во областа Антакија.
Вчера спасувачките екипи спасиле уште тројца членови на истото семејство за време на операциите за пребарување. И две други сестри затрупани под урнатините во областа Голбаси, провинцијата Адијаман, беа спасени по 70 часа. Церен (14) и Елиф (16) се добро и се пренесени во болница.
