Српската пејачка Милица Тодоровиќ отворено проговори за периодот кога се соочувала со психички предизвици и откри дека во тие моменти побарала совет и од најдобриот српски тенисер, Новак Ѓоковиќ.
Тодоровиќ раскажала дека отсекогаш ја интересирале темите поврзани со духовниот развој и внатрешниот мир, а токму за тоа во повеќе наврати разговарала и со Ѓоковиќ.
„Мене отсекогаш ме интересираше духовниот развој. Се прашував зошто се случуваат одредени работи околу нас и зошто луѓето понекогаш знаат да бидат лоши. Најважно ми е да бидам во мир со самата себе, а тоа е најголемото богатство. Со Новак многупати сум разговарала за тоа. Го прашував: ‘Како, брате мили?’ Ми даде многу прекрасни совети. Неговиот начин на размислување е неверојатен. Со години работел на себе до степен ништо да не може да го исфрли од рамнотежа“, изјавила пејачката.
Таа истакнала дека не се срами јавно да зборува за своите проблеми и дека е важно луѓето да сфатат оти барањето помош од психотерапевт не е слабост.
Милица открила и дека минатата година донела тешка одлука да ја откаже целата концертна турнеја затоа што не се чувствувала добро психички.
„Се обидував да им објаснам дека не сум добро и дека не сакам по секоја цена да настапувам кога во длабочината на душата сум тажна, а не знам ни зошто. Можеби сум единствената пејачка што откажала цела турнеја. Светот нема да застане ако Милица Тодоровиќ откаже концерти. Имаше големи финансиски последици, но здравјето е на прво место. Да не ја откажев таа турнеја, можеби денес немаше да седам тука“, рекла таа во емисијата „Премиера – викенд специјал“.
Пејачката неодамна повторно се појави во јавноста по раѓањето на синот Богдан и откри дека успешно се снаоѓа во улогата на мајка.
„Бебето е одлично, јас сум одлично и навистина уживам дома. Наскоро се враќам и на настапите“, изјавила Тодоровиќ.
