Ана Бекута донесе одлука да се повлече од местото член на жирито во музичкото натпреварување „Ѕвездите на Гранд“, по 12 години поминати во популарното шоу.
Пејачката соопшти дека станува збор за пауза и дека нејзината одлука не е поврзана со преминување во друго музичко натпреварување.
Бекута во жирито на „Ѕвездите на Гранд“ се приклучила во 2014 година, на покана на Саша Поповиќ.
Како што објасни во своето соопштение, Поповиќ сметал дека поради големиот број нејзини песни што кандидатите ги изведуваат, таа би била одличен избор за член на жирито.
По повеќе од една деценија помината во шоуто, Бекута смета дека дошол моментот да направи пауза.
„По 12 години сметам дека дојде време да направам пауза од најгледаниот музички формат, кој и самиот многу ми донесе“, навела пејачката.
Бекута истакна дека во текот на годините несебично го споделувала своето знаење и искуство со младите пејачи кои се натпреварувале во шоуто.
Таа додаде дека е особено горда на оние кандидати кои поминале низ нејзиното менторство и кои продолжиле да градат свои музички кариери.
„Повеќе од една деценија несебично со младите изведувачи ги споделував сите тајни на пејачкиот занает. Особено сум горда на сите млади луѓе кои поминаа низ моето менторство“, истакна Бекута.
Пејачката категорично демантираше дека нејзиното повлекување е поврзано со преминување во друго шоу или друго жири.
„Оваа одлука нема врска со преминување во некое друго жири, туку пред сè се однесува на односот кон кариерата“, објасни таа.
Бекута најави дека во периодот што следува ќе се посвети на сопствените музички проекти.
Покрај повлекувањето од „Ѕвездите на Гранд“, пејачката најави и нови активности поврзани со нејзината кариера.
Во подготовка е нејзиниот нов албум, а планира и нови концертни настапи, со кои, како што вели, верува дека ќе ја изненади својата публика.
На крајот, Бекута им се заблагодари на колегите и на продукцијата на „Ѕвездите на Гранд“ за долгогодишната успешна соработка и им посака успех во иднина.
По нејзиното заминување се огласи и продукцијата на „Гранд“, која во своето соопштение имаше само пофални зборови за пејачката.
Од продукцијата порачаа дека Бекута во текот на годините била многу повеќе од член на жирито – била учител, ментор, поддршка и потпора за бројни млади пејачи.
„Вратите на Гранд продукција за неа засекогаш ќе бидат широко отворени“, порачаа од продукцијата.
Тие ја истакнаа нејзината улога во кариерата на младите изведувачи и ја поддржаа нејзината одлука да се посвети на новиот албум, концертите и сопствената кариера.
„Ана, ти благодариме за сите години, за секој совет, секоја емоција, секој глас што го поддржа и за сè што со своето присуство им донесе на „Ѕвездите на Гранд“ и на Гранд продукција“, се наведува во соопштението.
Од продукцијата додале дека Бекута не е само долгогодишна соработничка, туку и пријателка на куќата и дел од семејството на Гранд.
Иако официјалната потврда сè уште не е објавена, како нејзина можна замена во жирито се споменува пејачката Сања Вучиќ.
Според неофицијалните информации, таа би можела да стане постојан член на жирито на „Ѕвездите на Гранд“.
Доколку ова се потврди, Сања Вучиќ ќе има задача да го преземе местото на Бекута во следната сезона на музичкото натпреварување.
