Македонската пејачка Каролина Гочева беше гостинка во најновото издание на емисијата „Спика и прилика“ на српската телевизија К1, каде во отворен разговор со водителот Бошко Јаковљевиќ проговори за својата кариера и приватниот живот.
Во емисијата, 45-годишната пејачка зборуваше за својот брак со уметникот Михаил Корубин, со кого е веќе осум години во стабилен однос. Гочева откри дека никогаш не се чувствувала притисната од општеството да влезе во брак и дека тоа за неа било природна и лична одлука.
„Едноставно, никогаш не сакав да се омажам само затоа што ‘дошло време’ или затоа што некој очекува од мене. Ништо не треба. Треба само да бидеш среќен“, рече Гочева.
Таа додаде дека дури по триесеттата година почнала вистински да размислува за брак.
„Секогаш бев во долги врски, но си ветив себеси дека нема да се омажам само заради редот, само за луѓето да престанат да прашуваат“, нагласи таа.
Гочева не го избегна ниту прашањето за разликата во возраста со сопругот, кој е шест години помлад од неа.
„Во Холивуд сите се со помлади мажи, тоа е светски тренд. А јас сакам да ги следам светските трендови“, изјави таа со насмевка на лицето.
„Ние двајцата се споивме како зрели луѓе, во нашите триесетти години. Никогаш не сум почувствувала разлика во годините. Се најдовме веднаш и до ден-денес остана тоа чувство“, објасни пејачката, додавајќи дека е среќна што не се подлегнала на притисоците и чекала да се омажи кога вистински ќе го посака тоа.
