Пејачката Марија Шерифовиќ сериозно размислува да започне ново поглавје од животот на Бали, дестинација која, како што и самата признава, ѝ донела внатрешен мир и целосно бегство од стресот.
Според српските медиуми, Марија за време на последниот престој во Индонезија разгледувала неколку луксузни недвижности, а во обиколките ѝ се придружила и нејзината блиска пријателка Јована Пајиќ. Наводно, двете посетиле повеќе вили и апартмани, но особено им се допаднала куќа во изградба, чија цена изнесува околу 215.000 евра.
Станува збор за премиум комплекс на Бали, сместен во близина на Улувату, со поглед кон океанот. Куќата има 111 квадратни метри станбен простор и двор од 195 квадрати, а комплексот нуди базени, ресторани, фитнес-сала, спа-центар, продавници, па дури и хелиодром.
Извор близок до пејачката тврди дека Марија веднаш посакала да ја резервира вилата, особено поради условите што ги нуди за нејзиниот син Марио.
„Кога ја виде детската зона, веднаш рече дека ова е совршено место за Марио“, открил изворот.
Марија веќе подолго време јавно зборува колку Бали влијае врз неа. На социјалните мрежи често објавува фотографии и видеа од островот, а во една прилика дури признала дека размислувала никогаш да не се врати во Белград.
„Животот е убав. Размислував и да не се вратам никогаш, но тоа малку го одложив“, изјави пејачката во видео обраќање.
Во една од своите објави, Шерифовиќ откри дека Бали за неа претставува место на длабоко преиспитување и духовен мир.
„Секојпат доаѓам со некакви прашања и немири, а си заминувам со одговори што не доаѓаат преку зборови, туку преку чувство“, напиша таа.
Нејзината мајка, Верица Шерифовиќ, наводно дури предложила семејството да остане на Бали сè додека малиот Марио не тргне на училиште.
