Хрватскиот музичар Дадо Топиќ (74) се огласи по смртта на неговата драга колешка Слаѓана Милошевиќ, со која ја изведе една од најубавите балади на регионалната музичка сцена – „Принцеза“ (1984).
„Иако знаевме дека не ѝ е добро во последно време, јас бев шокиран кога слушнав за смртта на Слаѓана. Ние често контактиравме и разменувавме мисли и идеи. Наскоро требаше да имаме заеднички настап во Загреб. Јас имам прекрасни спомени со неа. Таа беше добра пријателка, отсекогаш знаеше добро да размислува и да дава добри совети. Мило ми е што бевме поврзани цел живот. Ќе ми недостига чувството дека таа сѐ уште е тука и дека можам да ѝ се јавам во секое време. Многу ја сакав, таа беше прекрасна личност“, изјави Топиќ за „Данас“.
Да потсетиме, српската авангардна уметница и пејачка Александра Слаѓана Милошевиќ почина денеска на 68-годишна возраст.
