Освен како храна, многупати досега, во пракса се покажало дека медот може да биде совршен и за одржување на здравјето на кожата и на косата. Медот од страна на луѓето се користи илјадници години наназад и тоа за најразлични намени, но сè до пред дваесетина години, тој најмногу се користеше како храна, односно како засладувач.
Сепак, во изминативе неколку години, употребата на мед стана многу поактуелна, поради фактот што сите оние кои сакаат да изгледаат убаво, но и да бидат здрави, во обид да ги заменат маските за коса и за лице што се полни со најразлични хемикалии, како многу поздрава и поприродна варијанта за нега на коса, но и на кожата, го бираат медот.
Благодетите што може да ги почувствува вашиот организам доколку барем еднаш неделно го третирате со мед се бројни. Тоа е така затоа што медот во својот состав содржи околу 80 отсто шеќер, а во останатите 20 отсто содржано е железото, калциумот, фосфорот, витамините Ц и Б како и магнезиумот. Поради овие елементи медот се користи како состојка во многу козметички призводи.
