„Нашите музичари носат панцири наместо смокинг. Тие им пеат на ранетите во болниците, дури и на оние кои не ги слушаат“.
Во снимената порака, украинскиот претседател Володимир Зеленски ги повика гледачите и присутните на наградите Греми, настан кој вчеравечер се одржа во Лас Вегас, да ја поддржат Украина против руската инвазија на сите можни начини, и да ја „кажат нашата приказна“ и „да ја кажат вистината за војната“ на социјалните мрежи и на телевизија.
Пораката на Зеленски претходеше на музичкиот перформанс на Џон Леџенд и неколку украински уметници, посветен на украинскиот народ.
„Тишината на разурнатите градови и убиените луѓе. Нашите деца цртаа ракети, а не ѕвезди што паѓаат“, рече Зеленски. „Повеќе од 400 деца беа повредени, а 153 деца загинаа. И никогаш нема да ги видиме како цртаат. Војната не дозволува да избереме кој ќе преживее, а кој ќе остане во вечна тишина.“
Зеленски ги замоли сите оние што го слушаат: „Кажете ја вистината за војната. На вашите социјални мрежи. На телевизија. Поддржете нè на кој било начин. Билокој. Само не тишина… И тогаш ќе дојде мир. Во сите наши градови војната уништува“, рече тој. „Чернихив, Харков, Волноваха, Мариупол и други. Тие се веќе легенди. Но, имам сон во кој тие живеат. Слободни. Слободни како тебе на сцената на Греми“.
Неговиот говор беше проследен со изведба на „Free“ на пејачот Џон Леџенд, на која се придружија и украинските уметници Мика Њутн, Љуба Јакимчук и Сиузана Игидан.
