Финска е на неколку недели од поднесувањето на апликација за членство во НАТО и покрај руските предупредувања дека овој потег ќе резултира со „уништување на нивната земја“. Ова го тврди Александар Стуб, поранешен премиер на земјата.
Нордиската земја, која има долга граница со Русија, никогаш не била членка на алијансата. Но, по руската инвазија на Украина во февруари, истражувањата на јавното мислење нарачани од финските медиуми покажаа брз пресврт во јавното мислење со мнозинството „за“ членство.
„Имаше добронамерен обид за воспоставување работни односи со Русија и сега кога луѓето гледаат дека тоа е невозможно, особено со Путин, тие се предомислија“, објаснува Стуб.
НАТО „нема индикации“ дека Русија се откажала од окупација и контрола на целата земја. За време на самитот со министрите за надворешни работи, генералниот секретар на НАТО, Јенс Столтенберг, стави крај на сите илузии. Нема нови планови од Москва, а „војната ќе трае долго, можеби и години“. Поради ова, западниот фронт мора да продолжи да ѝ помага на Украина пред се од гледна точка на вооружувањето.
И за да биде јасно колку ситуацијата е променета во споредба со пред неколку месеци, британската министерка за надворешни работи Лиз Трус, за време на вечерата во средата навечер, беше јасна за иднината на односите со Кремљ: „Времето на соработка со Русија заврши „затоа што можноста за склучување договор во кој НАТО и Русија“ не се сметаат себеси за противници „умре“.
Но, постои уште еден аспект што го менува периметарот на Алијансата: Финска. Хелсинки сега е подготвен да аплицира за членство во Пактот. Границата на Финска со Русија е многу долга и во оваа фаза нејзината неутралност повеќе не е гаранција. „Сега – рече финскиот министер за надворешни работи Пека Хаависто – на анкетите јасно мнозинство од населението го поддржува членството во НАТО. Владата подготвува Бела книга која ќе биде доставена до Собранието следната недела. Како ќе продолжиме ќе зависи од Парламентот, но дебатата е во тек“.
Прашањето било долго дискутирано на Самитот и сите сојузници потврдија дека кога ќе биде претставена формалната апликација, процесот на прифаќање ќе биде многу брз.
Одговорот што ќе го дадат Москва и Кина ќе биде важен фактор за изборот во блиска иднина, почнувајќи од „Стратешкиот концепт“ (стратегијата на Алијансата за следните десет години) кој ќе биде одобрен на крајот на јуни на Атлантскиот совет во Мадрид. Во меѓувреме, ЕУ денеска ја потврди својата мисија во Киев. Претседателот на Комисијата Фон Дер Лајен и високиот претставник Борел ќе се сретнат со украинскиот претседател Зеленски во Киев, пренесува дагоспиа.
