Претставниците на првите 17 земји вечерва ќе дадат се од себе за да ги освојат симпатиите на гледачите на сцената на величествената сала Пало Олимпико во Торино и со тоа да обезбедат место во големото финале кое не очекува в сабота.
Кои земји ќе настапат вечерва?
Како што беше одлучено со ждрепката одржана на 25 јануари, во првото полуфинале ќе настапат 17 земји. Првично требаше да учествува и претставник на Русија, но поради санкциите изречени на таа земја Русија го загуби правото на учество на Евровизија. Така, во ова полуфинале ќе ги гледаме следните земји: Албанија, Летонија, Литванија, Швајцарија, Словенија, Украина, Бугарија, Холандија, Молдавија, Португалија, Хрватска, Данска, Австрија, Исланд, Грција, Норвешка и Ерменија.
Гласање
Во првото полуфинале ќе гласа жирито и публиката од 17 земји учеснички, како и Франција и Италија кои како дел од минатогодишната група на „топ 5“ имаат директен пласман во финалето. Стручното жири е составено од по пет музички експерти од секоја од земјите.
На нивните гласови ќе се додадат и гласовите од телефонско гласање на гледачите, кое започнува по завршувањето на последната изведба и ќе трае десет минути. Домаќините потоа по случаен редослед ќе ги прочитаат имињата на десетте најдобри, додека вистинските резултати од првото полуфинале ќе ги дознаеме дури по завршувањето на финалето.
Преносот на првата полуфинална вечер е обезбеден на сите телевизии на овогодинешните учесници на Евровизија. Шоуто со почеток во 21 часот можете да го следите во живо на МТВ1.
