– Денес и утре за Бадник времето во Македонија ќе се задржи стабилно, суво и сончево со мала до умерена локална облачност. Сепак утре во текот на денот, а особено во доцните попладневни и вечерни часови облачноста ќе се зголемува. Во претпладневните часови по одделни котлини ќе има појава на магла или на значителна ниска облачност. Ќе дува слаб до умерен ветер и тоа во западните предели од југозападен, додека во останатите предели од југоисточен правец, и истиот повремено на некои места ќе засилува на интензитет. Температурите ќе се искачуваат во интервалот од 10 до 16 степени – вели нашиот метео прогнозер Славчо Попоски.
Во Скопје и околината денес и утре времето ќе се задржи стабилно, суво и сончево со умерена локална облачност. Во претпладневните часови ќе има појава на магла или значителна ниска облачност, додека во текот на денот ќе дува слаб до умерен ветер од југоисточен правец. Температурите ќе се искачуваат во интервалот помеѓу 11 и 12 степени.
Според Попоски, во следните денови, односно за Божиќните празници времето ќе биде претежно облачно и постудено со повремени локални врнежи од дожд, додека на планините и на некои од повисоките места ќе има врнежи од снег. Ќе дува слаб до умерен ветер од променлив правец, а температурите ќе се искачуваат во интервалот од 4 до 12 степени.
