Мадона била пронајдена во несвест и итно пренесена во болница во Њујорк во саботата, ексклузивно открива американски Page Six.
Според информациите пејачката (64) била интубирана најмалку една ноќ пред цевката да ѝ биде извадена и сега е будна и се опоравува. Се известува и дека нејзината ќерка Лурд Леон била покрај неа цело време.
Долгогодишниот менаџер на Мадона, Гај Озири, сподели објава на Инстаграм дека неговата клиентка „разви сериозна бактериска инфекција што доведе до повеќедневен престој на интензивна нега“.
Изворот вели и дека кралицата на попот сега е „надвор од интензивна нега“, а Озири во својот пост објасни: „Таа се уште е под медицинска нега. Се очекува целосно да закрепне“.
Претходно годинава, Мадона објави дека ќе започне со турнеја насловена „Celebration“ по повод 40-годишнината од нејзината музичка кариера, но поради нејзината здравствена состојба, новите датуми за концерти ќе бидат објавени подоцна, изјави нејзиниот менаџер.
