Поранешниот тениски шампион Борис Бекер е осуден на две и пол години затвор поради даночна измама. Инаку шампионот на шест Грен слеми ризикуваше до 7 години затвор.
На почетокот на овој месец Бекер (54) беше прогласен за виновен од страна на Судот во Саутворк за четири од 24-те прекршоци за кои беше обвинет во судскиот процес за стечај во 2017. Судот во Лондон денеска донесе одлука за големината на казната што ќе треба да ја одлежи.
Борис ја чекаше казната носејќи ја својата шампионска вратоврска на Вимблдон, а најверојатно вечерва ќе оди во затвор за да отслужи половина од казната, додека преостанатиот период од притворот ќе биде на режим на полу-отпуст:
„Вреди да се напомене – изјави судијката Дебора Тејлор – дека не ја признава својата вина, па дури ни каење. Имаше тотален недостаток на понизност од негова страна“.
Утрото Бекер поминал извесно време со својот син Ноа, потоа пазарел во Хародс и на крајот купил букет цвеќе, веројатно за својата партнерка која никогаш не го оставила сам за време на судењето.
