Лидерот на СДСМ, Зоран Заев предмалку соопшти дека СДСМ ќе го прифати 15 јули како датум за избори.
– Одговорност е да направиш се, да обезбедиш институции кои нормално ќе функционираат. Ни треба активно собрание, ни треба целосно функционална политичка влада, пред се на граѓаните, а потоа и на власта и опозицијата. Само на тој начин есента ќе ја дочекаме спремни. Поголема криза од оваа не можеме да издржиме со техничка влада и без Парламент. Свесен сум дека на сите ни е преку глава од политички игри. Се знае кој во минатото бил најодговорен пред народот и државата. За да не страда народот, го заклучуваме 15 јули како последен датум за избори. Денеска повторно разговарав со Мицкоски и тој ми потврди дека е согласен да учествува на избори на 15 јули. Изборите ќе бидат во среда, кој ќе биде неработен ден. Очекувам Мицкоски јавно да прифати дека тој и неговата партија ќе учествуваат на избори на 15 јули. Следен чекор е да побараме од претседателот Стево Пендаровски да прогласи нова вонредна состојба. Овој пат барањето за вонредна ќе биде само заради усогласувањето на 15 јули како конечен датум за избори. И тоа е фер граѓаните да го знаат, ќе се бара Вонредна заради избори, бидејќи истата не е потребна заради економските мерки – тие се веќе во полна реализација. ВМРО-ДПМНЕ е на потег, да излезе пред народот и да се соочи со потребата од одговорно однесување. Натаму одлучуваат граѓаните, тие ќе кажат кој ќе се справува со Ковид на есен. СДСМ е одговорна власт која после 15 јули ќе продолжи да ја води државата на исправниот пат, уште подобро. Тоа го знаеме и го можеме – рече Заев и додаде дека изборниот молк ќе настапи на 12 јули.
Една од промените е бидејќи 15 јули е среда, а не недела. Ќе се гласа и на 13 и 14 јули (понеделник и вторник) кога своето право на глас ќе може да го остварат болните и изнемоштените, лицата кои се позитивни на ковид-19, како и оние кои се во самоизолација. Молкот, пак, ќе настапи на 12 јули, недела на полноќ.
Периодот за гласање на 15 јули, рече Заев, ќе биде зголемен, па наместо од 7 до 19 часот, би се гласало два часа подолго односно од 7 до 21 часот.
Двајцата лидери се договориле да го информираат претседателот Стево Пендаровски кој, пак, понатаму треба да ги извести останатите политички партии. Заев и Мицкоски ќе ги известат членовите на ДИК од нивните партии за да седнат, рече лидерот на СДСМ, и да ги усогласат сите протоколи.
The post Заев: СДСМ е одговорна партија, избори да има на 15 јули appeared first on Слободен печат.
Заев: СДСМ е одговорна партија, избори да има на 15 јули was first posted on јуни 15, 2020 at 3:11 pm.
