Лепа Брена во интервјуто за „Слободна Далмација“ зборувала за многу работи од нејзиниот приватен живот. Признала и дека тешко ѝ паднале некои работи, меѓу кои и распадот на Југославија.
„Најтешко ми беше кога се распадна Југославија, па кога во 1993 година умре менаџерот Рака Џокиќ. Една година претходно Боба ја повреди кичмата, а јас ја скршив ногата. Животот ми го одбележа и киднапирањето на Стефан во 2000 година“, рекла Брена.
Брена открила на кого помислува кога ја пее нејзината песна „Југословенка“.
„Повеќето луѓе на Балканот се носталгични. Кога зборувам за Југославија не зборувам за никаква политичка творба, пеев за неа како за земја во која живееме. Како што времето поминува, мислам дека публиката што доаѓаше на моите концерти е носталгична во смисла на добрососедски односи и комуникации бидејќи сме географски, културолошки, па и економски насочени едни на други. Кога ја пејам „Југословенка“ помислувам на сите луѓе кои живеат на Балканот, тоа е песна посветена на пријателството меѓу народите, независно од која религија се, која боја на кожа и кој пол. Ако една Европа се обедини и направи економска стратегија за опстанок, мислам дека тоа треба да се случи на просторот кој некогаш се викаше Југославија“, рекла Брена.
