Oпштинатa Кумровец ја купи вилата, резиденцијата на поранешниот југословенски претседател Јосип Броз Тито во Кумровец, а по формирањето на Република Хрватска во 1990-тите, таа стана сопственост на Музејот на Хрватско Загорје, пишуваат хрватските медиуми.
Станува збор за објект кој бил хотел во 40-тите години на 20 век, но за време на Југославија во 60-тите бил прогласен за резиденција на Броз.
„Ова е горд момент кога општина Кумровец го презема правото да стопанисува со овој објект“, изјави при потпишувањето градоначалникот на Кумровец Роберт Шплајт, кој иницираше пренос на сопственоста.
Идејата започна пред една година и брзо се реализираше во соработка со Министерството за просторно планирање и државен имот. Имавме одлична соработка и со Министерството за култура и медиуми и министерот веднаш се согласи со идејата. Првенствено замисливме вилата Кумровец да стане културен, туристички и мултимедијален објект“, рече тој.
Тој најави дека Општината планира да аплицира за средства од ЕУ за реновирање на објектот во кој не е значително инвестирано последните 40 години.
Проектот ќе биде доставен во програмата INTERREG следната недела. Се надеваме дека ќе успееме да ги обезбедиме првите средства во текот на следната година. Се проценува дека ќе ни требаат некаде околу 2 милиони евра за целосно да го пуштиме овој објект во функција“, рече градоначалникот и додаде дека тоа треба да се направи во рок од 3 до 4 години.
Директорот на Музејот на Хрватско Загорје, Јурица Сабол, пренесувањето на сопственоста од музејот на општина Кумровец го смета за чекор во позитивна насока.
„Една од причините за таа одлука е што до оваа година музеите не беа подобни кандидати за ЕУ фондови, за разлика од општините. Ни се чинеше дека ова ќе биде најлесниот начин да се ревитализира овој објект“, рече Сабол.
Што се однесува до колекцијата на предмети од вилата Кумровец, тие се составен дел од имотот на музејот Старо село.
