Раперот се соочува со низа обвинувања.
Американскиот рапер и хип-хоп магнат Шон „Диди“ Комбс е уапсен во Њујорк по обвинение кое се уште е запечатено, јавуваат светските медиуми.
Обвинителот на јужниот округ на Њујорк, Демијан Вилијамс, изјави дека раперот бил уапсен од федерални агенти на Менхетен и дека обвинението се уште е запечатено, пренесува Ројтерс, додека Би-Би-Си пренесува дека Вилијамс рекол дека деталите за обвинението ќе бидат откриени во текот на денот.
Адвокатот на Комбс, Марк Агнифило, рече дека неговиот клиент е „невин човек“.
Апсењето на раперот уследи по рациите на два негови имоти во Лос Анџелес и Мајами во март, како дел од истрагата за наводите за сексуален напад.
Музичарот се соочува со низа обвиненија, од сексуален напад до злоупотреба, за што беше обвинет и од неговата поранешна партнерка Касандра „Кеси“ Вентура.
Тој беше обвинет и за силување на девојка, а тој ги отфрли сите обвиненија.
Правните проблеми на Комбс започнаа минатиот ноември кога Вентура поднесе тужба против него.
Истата недела, уште две жени поднеле пријава за злоупотреба и напад.
Овој февруари тужба поднесе и поранешниот продуцент на раперот Родни Џонс Џуниор, кој рече дека Комбс се обидел да го „присили“ на секс со други мажи.
Комбс ги негираше обвинувањата, но еден месец подоцна неговиот имот беше претресен.
Во мај беа објавени видео снимки на кои се гледа како тој ја напаѓа и ја тепа својата поранешна партнерка Вентура, за што таа тврдеше во тужбата.
