Иако со години имаа турбулентен однос, Анабела Атијас и Гаги Ѓогани денес отворено зборуваат за тешките моменти низ кои поминале по разводот, но и за помирувањето што следувало години подоцна.
Во заедничко интервју, Анабела се присети на периодот кога нивниот развод стана јавна тема и како тоа се одразило врз нивните деца.
„Во моментот кога сè излезе во медиумите, во училиштето започна вистински пекол. Нина тогаш беше многу мала и не се сеќава на нашиот развод, што е добро. Но, четири или пет години подоцна, кога сето тоа повторно се актуализираше преку ријалити-програмите, луѓето повторно се потсетија на нашата приказна. Најтешко помина Нина, за која мислев дека најмногу сум ја заштитила. Таа тогаш не знаеше што се случува, а по седум-осум години повторно се соочи со сето тоа“, изјавила Анабела.
Во истиот разговор, Гаги Ѓогани проговорил и за својата борба со зависноста од дрога, откривајќи дека и покрај сите проблеми секогаш ја ценел лојалноста на поранешната сопруга.
„Таа е праведна и лојална жена. Никогаш не сум се плашел дека ќе ме изневери“, рекол Гаги.
View this post on Instagram
Денес, како што велат, најтешките периоди се зад нив. Поранешните сопружници сега имаат добар однос и заедно уживаат во улогата на баба и дедо, активно учествувајќи во растењето на својата внука.
Анабела смета дека простувањето е едно од најважните нешта во животот.
„Да простиш е најубавото нешто што можеш да си го подариш себеси“, порачала таа.
Гаги открил дека токму Анабела била таа што прва воспоставила контакт по долг период.
„Таа ми се јави. Претходно се гледавме на родендени и семејни прослави, но потоа разговаравме по телефон“, раскажал тој.
Анабела објаснила дека поводот бил нивниот заеднички Јутјуб-канал.
„Сакав да решиме некои работи околу заедничкиот Јутјуб-канал. Не можеше тоа да се прави преку други луѓе. Моравме да разговараме и така сосема спонтано повторно воспоставивме контакт“, рекла пејачката.
Таа додава дека многумина не можат да разберат дека луѓето прават грешки, минуваат низ тежок период, но и дека имаат право на нов почеток.
„Жал ми е за луѓето кои не можат да сфатат дека човек може да згреши, да има проблеми и лош период во животот, но и да прости и да даде нова шанса. Особено кога станува збор за семејството. Мислам дека тоа е прекрасна порака и доказ дека сè може да се обнови и да има среќен крај. Секоја религија го вреднува простувањето и љубовта. Кога ќе кажеш: ‘Погрешивме, ајде да почнеме одново и овој пат да бидеме подобри и помудри’, не гледам ништо лошо во тоа. Ми е драго што повеќето луѓе ја поддржаа нашата приказна и што се радуваат на тоа каков однос имаме денес“, изјавила Анабела.
