Пејачката Теодора Џехверовиќ првпат подетално проговори за нарушениот однос со младата колешка Ема Радујко, со која своевремено била многу блиска.
Иако досега не сакала многу да зборува за нивната расправија, Теодора сега откри повеќе детали за причините поради кои нивното пријателство завршило.
„Не толерирам непочитување од нејзина страна. Таа гостуваше во една емисија и не зборуваше убаво за мене, иако можеби таа не го сфатила тоа така. Мене ми беше доволно да видам како стојат работите. Мислам дека навистина ѝ помогнав во животот, само со тоа што ја запознав со одредени луѓе“, изјавила пејачката.
На прашањето дали Ема се обидела да го поправи нивниот однос, Теодора одговорила дека не гледа можност за враќање на старото пријателство.
„Не постои ништо подалеку од тоа. Така треба и да остане. Со некои луѓе чувствувам дека сум го надраснала тој однос, а со некои едноставно немам потреба да го поправам, бидејќи мислам дека така е најискрено“, рекла таа.
Нивниот конфликт во јавноста се појави откако Ема Радујко реагираше на споредбите со Теодора. Младата пејачка тогаш не криеше дека ѝ пречи постојаното споредување и изјави дека таа е природна, за разлика од Теодора, која според неа имала естетски корекции.
Таа исто така нагласи дека не морала да го гради патот кон успехот преку музички натпревари и реални шоуа, како што тоа го направила Теодора.
Теодора тогаш изјавила дека била изненадена од интервјуто на Ема, бидејќи сметала дека некои од нејзините зборови звучеле непотребно грубо.
„Искрено се изненадив кога го видов нејзиното интервју. Можеби Ема немала намера да каже нешто лошо, но така излезе и морам да бидам искрена. Навистина ѝ дадов голема поддршка и затоа очекував за мене да зборува онака како што заслужувам, без споменување на естетски зафати или на мојот пат, за кој сметам дека беше многу тежок, но исправен“, рекла пејачката.
Таа додала дека без предрасуди ѝ дала можност на Ема да се појави во нејзин спот, каде што ја запознала и со својата менаџерка.
„За неа слушнав кога луѓето ми покажуваа девојка која се фотографира како мене, се облекува како мене и игра како мене. Мене тоа тогаш ми беше навистина симпатично. Нема потреба на прашањето дали ме имитира да се споменуваат работи кои не се важни. Треба искрено да каже дека пред сето ова таа навистина беше мој фан и сакаше да го постигне она што јас го постигнав со работа и труд“, изјавила Теодора.
