Метео прогнозерот Славчо Попоски нè информира какво време ќе имаме за време на викендот и како ќе ни почне следната недела.
– За време на овој викенд ќе биде понестабилно, на повеќе места ќе има појава на пороен дожд, грмежи и засилен ветер. Локално е можна и појава на невреме, проследено со силен ветер и со појава на град. Температурите остануваат многу високи и тоа поради влијанието на многу топла воздушна маса која продира од северните предели на Африка. Максималните дневни температури ќе се искачуваат во интервалот од 24 до 30 степени, додека во најтоплите предели се очекува да се искачат и малку над 30 степени – вели Попоски.
Според Попоски, во почетокот од следната недела сè уште ќе има услови за локална попладневна нестабилност, додека постабилна атмосфера се очекува од средината на неделата. Минималните температури ќе бидат значително повисоки и ќе се спуштаат во интервалот од 8 до 14 степени, додека максималните дневни остануваат многу високи и ќе се искачуваат во интервалот од 25 до 32 степени, а мал пад на истите, барем отсега гледано, се очекува од среда.
