Пејачката Ана Николиќ повторно се огласи во јавноста поради здравствената состојба на Ивица Дачиќ, кој е хоспитализиран и се наоѓа во тешка состојба. Таа остро реагираше на негативните коментари што се појавиле на социјалните мрежи.
Николиќ преку објава на Инстаграм им порача на сите што, како што вели, „мешаат политика во момент на нечија борба за живот“, дека нема да премолчи.
„Само да му биде подобро, ќе ве најдам секој поединечно. Ова нема врска со политика, туку со болеста на еден дел од нашата нација. Срам да ви е што во момент на нечија борба за живот пишувате навреди“, напиша таа.
Пејачката нагласи дека е аполитична и дека Дачиќ го познава три децении, истакнувајќи дека станува збор за лична поддршка, а не политички став.
Инаку, Дачиќ е хоспитализиран на Клиниката за пулмологија при Клиничкиот центар на Србија поради тешко воспаление на белите дробови. Според изјавите на медицинскиот тим, неговата состојба и понатаму е сериозна, но во моментот нема дополнително влошување. Лекарите велат дека е прерано да се зборува за понатамошниот тек на лекувањето.
