Нашиот тим започна соработка со една посебна, прекрасна мајсторка во кујна – Мартина Трајаноска.
Шармантната Мартина стои зад превкусните рецепти пласирани на инстаграм-профилот (martinascooking).
Готви од мали нозе, а со текот на годините и искуството научила дека најважна состојка во секое јадење е – љубовта.
Денес Мартина ни направи превкусни пица ролнички. Мини пици со чајна, кашкавал и кечап. Брзи, лесни и едноставни за подготовка, а одлични за ужинка или појадок, посебно омилени на малите дечиња.
Тестото е ептен меко и пуфкасто затоа што е со јогурт, а Мартина вели дека некогаш додава и газирана вода (пола јогурт, пола газирана вода).
Потребни состојки:
- 400 мл јогурт
- околу 1 кг брашно
- 1/2 квасец
- 1 пециво
- 50 мл масло
Фил:
- чајна, кулен (сувомеснато по избор)
- кашкавал
- кечап
View this post on Instagram
Подготовка:
Измешајте го јогуртот со маслото, додадете го квасецот и пецивото( а може и само со квасец или само со пециво). Додавајте брашно и мешајте со лажица, па префрлете го тестото на набрашнета површина и измесете го убаво. Тестото може да ви се лепи, измиете си ги рацете и измесете го уште малку. Оставете го тестото да постои дури го спремате филот.
Изрендајте кашкавал, насечете ја чајната на мали парчиња, додадете кечап и измешајте. Тестото поделете го на 2 дела. Од секој дел исукајте кора и ставете фил врз неа. Исечете ја на ленти( најлесно со нож за пица). Секоја лентичка завиткајте ја како полжав и редете на плех со хартија за печење. Премачкајте со јајце и печете во загреана рерна на 180/200 С околу 15тина минути.
Послужете и уживајте. Супер идеја за да направите нешто брзо и лесно викендов!
На здравје!
