Нашиот пејач Владо Јаневски замина на оној свет, но ќе остане запаметен по најубавите песни коишто ни ги остави и по специфичните изјави што ги даваше на интервјуата.
Деновиве се потсетуваме на сета негова музика, ги преслушуваме хитовите како „Напрај место“, „Разголи ми ја душата“ или евергрините како „Нусе“, „Некогаш и негде“, „Булки“…
Медиумите коишто му направиле интервјуа споделуваат парчиња од неговите одговори. Ќе се потсетиме на неговата изјава за Бекстејџ, а поврзана со трачевите, во која тој вели дека колку повеќе траеш толку подолго ќе живее трачот за тебе.
„Додека постоиш ќе те следи трачот за тебе. Јас според многумина бев и геј, бев болен од сида, па како се излечив од сида, па бев ваков-таков. Истите работи се вртеа со години за мене. Одеднаш гледаш по неколку години некој ист трач го воскреснале како феникс. Јас одлучив дека е најдобро да не негирам, поевтино ми беше да чекам да помине бурата отколку да се објаснувам“, вели Јаневски во оваа изјава.
